الحزن مش للزعلانين
الحزن أنبل من كده
علشان كده
بيلفّ على كل البيوت
الحزن للناس العادية
الحزن للناس العادية
و الشوارع
و الجناين
و البنات
البنت لمّا بتتكسر
و بتتفرط على إيد حبيب ماعرفش قيمة قلبها
أجمل كتير
و اطهر كتير
و أحنّ ميت مرّة
من البنت اللي بتقابل و لد طول النهار
و ف اخر الليل الطويل
تبعت رسالة تقولّه
بتهيألي نفضل أصدقاء
فاكر زمان
ف حصة الألعاب
كانوا العيال يتنططوا
و أروح أعُد في المكتبة
أحزن
و المّ الحزن حواليّا
كل العباقرة اللي الهموم
حفرت على وشوشهم كلام
حتى النبي
عايش حزين
ميّت حزين
حملك تقيل يا نبي
و الحمل من بعدك تقيل
على إيه بقى هذا المرح
و الانبساط؟
إحزن
و من نبّى النبي ينبّيك
إحزن كرامة للنبي
و اهو تبقى حاجة من روايحه و السلام
بازعل ساعات
عشان مانيش شاطر أوي
عشان ماليش في الفهلوة
و الشعبطة
و الخد..و هات
و ساعات أقول
كان يعني لازم تتولد
هذا البلد؟
مش عايز احلف بالبلد
و لا بالولد
و لا باللي والد و اتولد
و لا باللي قاعد فوق دماغنا من سنين
زي اللي قاعدة ع الطحين
الحزن مش للزعلانين
الحزن للناس العادية
و الشوارع
و الجناين
و لحبيبتي
لمّا قلتلها اني أصغر منّها بسنتين تلاتة
مع إن ده أحسن كتير
لو ربنا قدّر و كنا لبعضنا
هاديها من عمري
سنين أكتر من اللي هاتدّيهالي
مافيش عينين
أسود و أطيب من كده
مافيش عينين
أجمل و أنبل من كده
علشان كده
الحزن أطيب م الفرح
الحزن أشيَك م الفرح
ياهل الله يا أهل الحصير
القهوة مش لاقية اللي يشربها
مدّولي في ريحكم كليم
و لتسمحولي
أدخل الحضرة معاكم
لاجل اقابل ربنا
طاهر أوي
و حزين أوي
هناك ٣ تعليقات:
جميلة جميييييييييييييلة بجد..
بس لسة ما غيرتش الحتة دي:
"كان يعني لازم تتولد
هذا البلد؟
"
مش قلت لي لازمها تغيير؟
عن جد رائعة!! قرأتها أكتر من مرة. حبيت بس أقول انطباعي عنها، يعني مافيش نقد و لا الكلام ده
ما شاء الله.. رائعة حقا، خصوصا المطلع
"الحزن مش للزعلانين
الحزن أنبل من كده
علشان كده
بيلفّ على كل البيوت"
هناك أجزاء أشعر أن وزنها مكسور، مثل "لمّا قلتلها اني أصغر منّها بسنتين تلاتة"..
أعتقد أنك تستطيع ضبطها، قبل نشرها في ديوان إن شاء الله..
تحياتي :)
إرسال تعليق